Post by Laoupdate on Feb 22, 2005 5:04:52 GMT -5
ຕາມສະຖິຕິໂຣກເອດຂອງນະຄອນຫລວງວຽງຈັນ ປີ 2003 ໃນຈຳນວນຜູ້ທີ່ໄດ້ຮັບການກວດເລືອດ 55.960 ຄົນ, ພົບຜູ້ຕິດເຊື້ອ HIV 325 ຄົນ ເປັນເອດ 173 ຄົນ, ເສຍຊີວິດແລ້ວ 89 ຄົນ, ຈັດເປັນອັນດັບທີ 2 ຂອງທົ່ວປະເທດ ຮອງຈາກແຂວງສະຫວັນນະເຂດ ການຕິດເຊື້ອແມ່ນມີທ່າອ່ຽງເພີ່ມຂື້ນເລື້ອຍໆ ໃນນັ້ນກຸ່ມສາວບໍລິການກໍແມ່ນກຸ່ມຫນື່ງທີ່ມີຄວາມສ່ຽງສູງ ຕໍ່ການຕິດເຊື້ອ HIV ຫລື ພະຍາດຕິດຕໍ່ທາງເພດສຳພັນ (ພຕພ) ຍ້ອນເຂົາເຈົ້າຍັງບໍ່ທັນຮັບຮູ້ເຂົ້າໃຈແຈ້ງກ່ຽວກັບຮ່າງກາຍ ສຸຂະພາບຈະເລີນພັນ/ທາງເພດ ໂຣກເອດ/ພຕພ ຂາດຄວາມລະມັດລະວັງເວລາດື່ມເຫລົ້າ ການມີເພດສຳພັນທີ່ບໍ່ປອດໄພ ແລະ ອື່ນໆ ດັ່ງນັ້ນ ເພື່ອເປັນການໃຫ້ຄວາມຮູ້ ເພື່ອປ່ຽນພຶດຕິກຳສ່ຽງຂອງເຂົາເຈົ້າ ໃນຕອນເຊົ້າຂອງວັນທີ 18 ກຸມພາ 2005 ນີ້ ຢູ່ທີ່ໂຮງໝໍເມືອງໄຊເຊດຖາ ນະຄອນຫລວງວຽງຈັນ ຈຶ່ງໄດ້ຈັດໃຫ້ມີການພົບປະບັນດາເຈົ້າຂອງຮ້ານອາຫານ ຮ້ານກິນດື່ມ ແລະ ຮ້ານບັນເທິງ ເພື່ອສຸຂະພາບດີຂອງສາວບໍລິການຂື້ນ.
ມີທ່ານ ບຸນຕາ ແສງດາວົງ ຮອງເຈົ້າເມືອງໄຊເຊດຖາ ທ່ານ ຄັນທະລາດ ພິລາພັນເດດ ຫົວໜ້າຫ້ອງການສາທາເມືອງ, ທ່ານ ດຣ. ພອນປະເສີດ ອຸນາພົນ ຫົວໜ້າກອງເລຂາ ຕ້ານເອດ ນະຄອນຫລວງວຽງຈັນ ພ້ອມດ້ວຍທິມງານຕ້ານເອດຂັ້ນນະຄອນຫລວງ ຂັ້ນເມືອງ ແລະ ບັນດາຮ້ານກິນດື່ມບັນເທິງເຂົ້າຮ່ວມ 40 ກວ່າຄົນ.
ໃນການພົບປະໄດ້ແຈ້ງກ່ຽວກັບສະພາບຂອງໂຣກເອດ ຢູ່ໃນໂລກ ພາກພື້ນ ແລະ ຢູ່ ສປປ ລາວ ໃນຊຸມປີຜ່ານມາໃຫ້ຜູ້ເຂົ້າຮ່ວມໄດ້ຮັບຮູ້ ພ້ອມທັງແນະນຳກ່ຽວກັບເສັ້ນທາງຕິດຕໍ່ ອາການ ການປ້ອງກັນ ການປິ່ນປົວ ການໃຊ້ຖົງຢາງອະນາໄມ ແລະ ອື່ນໆ ຊຶ່ງທັງຫມົດເຫລົ່ານັ້ນ ເປັນການຫລຸດຜ່ອນອັດຕາການຕິດເຊື້ອ HIV ໃຫ້ນັບມື້ຫລຸດນ້ອຍຖອຍລົງ.
ຂ່າວແຈ້ງໃຫ້ຮູ້ຕື່ມວ່າ ການພົບປະລັກສະນະດັ່ງກ່າວ ໄດ້ດຳເນີນມາເປັນເມືອງທີ 4 ແລ້ວ ແລະ ຈະດຳເນີນໄປອີກໃຫ້ສຳເລັດທຸກໆ ເມືອງໃນນະຄອນຫລວງວຽງຈັນ.
News: Vientianemai
Source: mahasan.com
photo: www.jfpr-hiv.org
Laoupdate.com
