Post by Laoupdate on Feb 16, 2005 0:29:36 GMT -5
ອົງການທ່ອງທ່ຽວແຫ່ງຊາດລາວ ຮ່ວມກັບ ອົງການພັດທະນາສາກົນ ປະເທດນິວຊີແລນ ກຳລັງຄົ້ນຫາແນວທາງ ເພື່ອພັດທະນາແຂວງຫົວພັນໃຫ້ກາຍເປັນ
ແຫຼ່ງທ່ອງທ່ຽວຫນື່ງໃນສິບອັນດັບ ຂອງປະເທດລາວພາຍໃນປີ 2005 ນີ້.
ໃນປະຈຸບັນ ແຂວງຫົວພັນຍັງເປັນຫນຶ່ງໃນແຂວງທີ່ຍາກຈົນທີ່ສຸດໃນປະເທດລາວ ໂດຍທີ່75ສ່ວນຮ້ອຍຂອງປະຊາກອນແມ່ນດຳລົງຊີວິດຢູ່ພາຍໃຕ້ເສັ້ນແຫ່ງຄວາມ
ທຸກຍາກ. ທ່ານສຸ່ນມານີວົງ ຫົວຫນ້າແຜນການແລະການຮ່ວມມື ຂອງອົງການທ່ອງ ທ່ຽວ ແຫ່ງຊາດ ໄດ້ເປີດເຜີຍໃນວັນທີ່ 11 ກຸມພາທີ່ຜ່ານມາວ່າ ເຫດຜົນຫນຶ່ງທີ່ເລືອກແຂວງນີ້ເປັນ
ຈຸດຍຸດທະສາດຂອງການພັດທະນາການທ່ອງທ່ຽວ ກໍ່ເພຶ່ອຊ່ວຍໃຫ້ແຂວງນີ້
ຫຼຸດພົ້ນອອກຈາກຄວາມທຸກຍາກ. ທ່່ານຍັງມີຄວາມເຊື່ອຫມັ້ນວ່າ ເງິນທີ່ໄດ້ມາຈາກ
ການທ່ອງທ່ຽວ ຈະຊ່ວຍໃຫ້ປະຊາຊົນທ້ອງຖິ່ນໃຫ້ມີຊີວິດການເປັນຢູ່ທີ່ດີຂຶ້ນ. ດັ່ງນັ້ນ
ທາງອົງການທ່ອງທ່ຽວແຫ່ງຊາດລາວຈຶ່ງໄດ້ຈັດທຳສະຖານທີ່ເພື່ອກໍ່ສ້າງ ບ້ານພັດ ປັບ
ປຸງສາທາລະນູປະໂພກ ແລະ ສິ່ງອຳນວຍຄວາມສະດວກຕ່າງໆ ພ້ອມກັນນັ້ນ ກໍ່ຊ່ວຍ
ສົ່ງເສີມໃຫ້ປະຊາຊົນທ້ອງຖິ່ນ ຜະລິດສິນຄ້າຫັດຖະກຳເພື່ອວາງຂາຍ.
ທ່ານຍັງກ່າວອີກວ່າ ແຂວງຫົວພັນເປັນແຂວງທີ່ມີສັກກະຍາພາບໃນການທ່ອງທ່ຽວ ໂດຍອ້ອມຮອບໄປດ້ວຍທິວທັດທຳມະຊາດ ແລະເປັນແຂວງທີ່ມີສອງປ່າ ທີ່ກ້ວາງທີສຸດ
ໃນປະເທດລາວ ອັນອຸດົມສົມບູນໄປດ້ວຍ ສັດປ່າຫາຍາກນານາຊະນິດ ທັງເປັນແຫຼ່ງຂອງທັນຍາພືດ ແລະ ຊີວະນານາພັນອີກດ້ວຍ. ແຂວງນີ້ຍັງມີຄວາມເດ່ນ
ໃນການມີແຫຼ່ງນ້ຳພຸຮ້ອນ ແລະ ສະຖານທີ່ສຳຄັນທາງປະຫວັດສາດຢ່າງຫຼວງຫຼາຍ ໂດຍສະເພາະແມ່ນຖ້ໍາວຽງໄຊ ຊຶ່ງເປັນຖານທີ່ຫມັ້ນ ຂອງພັກປະຊາຊົນປະຕິວັດລາວ ໃນປາງສົງຄາມ.